في هذا الموضوع المتجدد بناخذ لنا مبدأ من مبادئ الايتيكت

وبنحكي لكم قصص ومواقف من حياتنا نحن السعوديين وايتيكيتنا

المبدأ الأول

لاتصير مثل احدهم " واحد مش صاحبي ما تعرفوهوش"

بعض الناس هذا زاره  بعض الناس " واحد مش صاحبي ولا عاوز اعرفهوش"..

احدهم هذا عنده دوام الساعه 7 الصبح

  وقهواه وعشّاه وخلصت سوالفه هو واياه

وبعد العشا اخذ بعض الناس الريموت  وحطه على قناة افلام

وبدا الفلم الساعه 11 وقعد يتابعه ..ويوم جت الساعه 12

تحرك بعض الناس من مكانه ..

احدهم فرح يحسبه بروح لبيته

وقال له مجامله :

ويييين ؟؟

بدري وتو الناس يا نكبة الجلاس؟

رد بعض الناس وقال :

ايه بدري ..لا مانيب رايح بتسلقى على ظهري شوي

علشان امخمخ على الفلم

وتجي الساعه  1 ويبدا احدهم ينود

وبعض الناس يتابع بحماس واهتمام

ويوم خلص الفلم على الساعه 1ونص

بعض الناس   شاف راعي البيت احدهم ينود .وقام ووقف

قال له احدهم مجامله :

وييين؟

يا شين بدري وتو الليل ما هوّن؟

قال بعض الناس :

لا مانيب رايح.. بس قم شف الطريق بروح اطير الشراب

وراح للحمام ورجع..

وبدا الفلم الثاني على الساعه 2 ..

يوم جت 2 ونص قام بعض الناس يتثاوب

في حين ان احدهم يغط في النوم  دقايق ويتوعّى..

يوم شاف احدهم بعض الناس يتثاوب قال شكله بيطس

وقال له مجامله :

افا ...جاك النوم؟؟

رد بعض الناس وقال :

ايه بديت انعس وذا الفلم باقي عليه ساعه ونص

وهو ما ينتفوّت..

قال احدهم .. بعد ما طفح الكيل

يا رجال صحتك الزم عليك رح نم وارتاح

وتبي اسجل لك باقيه سجلته

قال بعض الناس ..

يا رجال بلا تسجله بل خرابيط ..

اقول صب شاهي بس ويطير النوم

ويصب احدهم له شاهي ويقعد بعض الناس يقحن ويتابع الفلم

واحدهم منسدح على المركى ..

شوي ويسمع بعض الناس شخير احدهم

ويلتفت عليه وينغزه ويقول له:

ياخوي ازعجتني شخيرك ما خلاني اركز على الفلم

ويصحى احدهم ويقول :

 معليش يااخوي ..

 نامت عيوني... وقضى الليل و طاعونك ما نامي

ويحاول احدهم انه ما يرقد مراعاة لمشاعر بعض الناس

لكن ما قدر يقاوم النوم , ورجع ونام وقعد يشخر..

يوم خلص الفلم التفت بعض الناس على احدهم ورجفه وقال :

اردى منك من يسيّر عليك

اقول قم شف لي الطريق انت وشخيرك..

الله يعظّم اجر زوجتك ياصبرها عليك !!