شهر الرسايل المجانيه اللي قدمته شركة الاتصالات السعوديه لعملائها

واللي ينتهي هذا اليوم

كان له آثار مختلفه على الفرد والاسره والمجتمع

هلمّوا معي نتناولها ..واللي ما وده يهلمّْ معي بسلامته

انا بهلمّْ بلحالي  

صلة الرحم

ذا الرسايل المجانيه لو تستمر مدى الحياة

بيكسبون عملاء اس تي سي حسنات كبر الجبال من كثر ما هم واصلين للرحم

الجميع صار واصل للرحم ..وغير الرحم ..بل ان البعض صار واصل لارحام نسباه وعدلاه

بس ان صلتهم للرحم تكون للارحام اللي من عملاء اس تي سي ..

اما ارحامه من عملاء موبايلي وزين وصلهم مافيه لا اجر ولا ثواب  

فاحد  الشباب ما يشوف جدته الا لين جتهم في بيتهم واحيانا تجيهم وما يشوفها

صار يرسل لجوالها  يوميا اكثر من 25رساله دينيه

وهي ما تعرف لا تقرا ولا تكتب وما تعرف تدق الا على 9 ارقام

اللي تتخزن في الجوال ..لا وتلخبط بين رقم ولدها ناصر ورقم بنتها شيخه

مع ان  رقم ناصر مخزنينه لها بالرقم 1 واحد وشيخه رقم 9

ومن كثر رسايله لها اتصلت عليها بنتها(ام الولد)

وما ردت وخافت ان فيها شي وجت لها في البيت

وقالت وراتس يا اميمتي ما تردين على الجوال

قالت مانيب راده وبكسره بعد..

اشغلني ولدتس في نفسي من اصبح لين امسي وهو ترررن ترررن

الله يعمي عدوه وشهو له يصجني بذا الرسايل

قالت امه ..ايه ولدي واصلن كله ابوه..

بس ترا وصلهم  مهوب مبطي,راح منه شهر مكالمات

وباقي شوي من شهر الرسايل  

زيادة عدد الواعظين والواعظات

ذا الرسايل خلّت كل عملاء اس تي سي دعاة وداعيات

الكل ينصح والكل شغالين حَث وتحثيث لاخوانهم من عملا اس تي سي

على الصلاة والصدقه والبر وحسن الخلق

وكأن اللي يعرفونهم في موبايلي وزين مجوس والا بوذيين

والا ضامنين الجنه بس يبي لهم يموتون

وبيتعدون الصراط بنجاح ويدخلون الجنه

فهم مو بحاجه لنصح وارشاد  

 

ومثل ما قلت الكل ينصح والكل يوعظ

مثلا تلقون بنت تقعد ساعه ترسل رسايل لصديقاتها عن بر الوالدين وفضل الأم

واميمتها طول ذا الساعه تناديها تعطيها دوا الضغط والسكر وسافهتها

لين ارتفع ضغطها وسكرها  

والا واحد مرسل رسايل عن التزود بالحسنات في هذه الدنيا الفانيه

ومن ضمن الرسايل الوعظيه اللي ارسلها ابيات الامام الشافعي :

تزود من التقوى فانك لا تدري

اذا جنّ ليل هل تعيش الى الفجري

فكم من صحيح مات من غير علة

وكم من سقيم عاش حين من الدهر

وبعد ذا الرساله يرسل ثمانيه واربعين رسالة وسائط اباحيه يندى لها الجبين  

العلاقات الزوجيه

ازواج وزوجات توطّدت علاقاتهم

وازواج وزوجات كانت علاقاتهم متوطّده وذا الرسايل حاست توطّدها

مثلا زوج ما عمره ارسل لزوجته أي رساله رومانسيه

وما يعرف من المشاعر الا المشاعر المقدسه

صار يرسل لها رسايل رومانسيه من اشعار نزار قباني

صح هو ما يفهم فيها ولا بيت ,واصلا ما قرا فيها ولا بيت

ياخذها من سليمان خويه المعروف برومانسيته

واحاسيسه المرهفه وحبه لشعر نزار قباني

لدرجة ان خويا يسمونه سليمان المرهف  

 

المهم ذا الزوج ماعليه الا انه يسوي لها اعادة ارسال لزوجته

ومع ذلك أثرت فيها وغيرت نفسيتها وبعد ما كانت حايمتن تسبدها منه

وتتشكى من جفاسته ,,غيرت نظرتها وقالت ياحبي لأبونا

كل ذا الرومانسيه فيه وما منعه يظهرها لي الا خوفه من الفواتير

 

مع انها اصلا ما تعرف من القباني الا كنافتهم  

وزوجات كانت حياتهم مع ازواجهم عسل في عسل

وراضين في ازواجهم وجفاستهم وما ظهر لهم على السطح احد يخليهم يزهدون في ازواجهم

علشان ما عندهم الا ريسيفر المجد ..

وما اظن ان الاخ الفاضل عيد الدوسري فيه من الطخامه ما يخلي الزوجه تزهد في زوحها

ويوم بدت الرسايل المجانيه  الحرمه اللي كانت ما تجيها الا رسايل

 "تبرعوا لمرضى الفشل الكلوي"

صارت تجيها رسايل وسائط رومانسيه كلها خمخمه واحضان وسماجه

من مهند ولميس الى كليبات اللبنانيين

وصارت بدال ما تسميه ابونا صارت تسميه ابو كرشه

وبدال ما كان يهمها انه ما ينام وهو عليها غضبان

صار ينام في الليل  وهو غضبان  ويقيّل الظهر وهو غضبان ..

حدثني احد الثقات عن زوج توترت علاقته بزوجته لانه  كان يروح لدوامه وهي تنام

ويقعد يرسل لها من الرسايل رومانسيات وشعر

وكل شوي مصحيتها نغمة الرساله

يوم رجع من الدوام كان بازّن بنفسه ومسوي انه مخققها بالرسايل

ويدخل عليها في غرفتها ويقول هاه وش رايتس فيني وفي رومانسيتي؟

وردت عليه من تحت المفرش وقالت :

ايه الله يجيب يوم 5 صفر على الاقل افتك من ازعاج رسايلك وانا نايمه

همّن تطاقوا وتزاعلوا حتى كتابة هذه السطور..... 

 وازواج وزوجات صار شغلهم الشاغل ارسال واستقبال النكت

مع ان آخر علمهم بالنكت ايام ما كانت تبدا بعبارة "كان فيه جحا"

 (كان فيه جحا وقع عصفور على راسه وسواها عليه
 
قال له جحا الشرهه على امك اللي مالبستك صروال)  

اثار سلبيه متفرقه

بعض اللي كانوا ينتقدون او يتضايقون من كثرة الرسايل الل تجي لزملائهم

وانها كلها من لغو الكلام ومن الامور التي لانفع فيها

صاروا ما يرسلون ولا يستقبلون الا رسايل كلها لغو الكلام في لغو كلام

بعد ما كان جوال الواحد منهم ماتجيه الا رسالتين يوميا

رساله قبل صلاة الظهر ورساله قبل صلاة العصر وكلها من جوال مسجد الراجحي

عن عدد الجنائز اللتي سوف يصلى عليها ظهرا او عصرا ... 

..احد الشباب المحترمين من اللي تجاوز ال35 سنه وما اعرس

و اللي من دوامه للبيت ومن البيت لدوامه ماله في التسكع ولا الدشره

 يوم شاف انه توفر عنده ارشيف كبير من الرسائل المتنوعه

مابين رسائل رومانسيه ونكت ومقاطع ,,قعد مع نفسه وقعد يحاورها

وقال لها : اقول يا نفسي: الحين انا عزوبي ووغاسلن يدي من العرس

وصفقيني ان قدرت ادبر مهر لو23 الف

لكن بعد مابي يروح شبابي وانا ما سمعت صوت اي بنت من غير محارمي

قالت له نفسه طيب وش طلباتك؟

قال : ابد الحين الله يخلي لنا شركة الاتصالات

توفر عندي رصيد من الرسايل الرومانسيه والكلام الحلوه

ورصيد من النكت والتميلح , فودي عاد الله يسلمتس استفيد منه واغازل به ..

قالت له نفسه بصرك ..

من بعدها الرجال طاح في المغازل والترقيم على كبر ..

فلاحول ولاقوة الا بالله  

البعض كان وش حليله ما صادق في حياته اي شاب

صداقاته كلها مع ابوه وشياب ابوه ..وكان دائما وابدا يغض البصر

لدرجة انه اذا جوا يحكون عن جمال النساء

يحسب ان الجمال هو في الجدايل ..

لان هذي هي مواصفات الجمال اللي يعرفها على حسب ما يسمع من سوالف ابوه

ويستشهد ببيت قديم من  الشعر اللي يقول:

يابو جديل فوق متنه تثنّى

والعود مثل الخيزران الليانا

وما عمره شاف شي من عورات النساء الا زوجته

وبعد تلقونه ما شاف منها الا نص ساقها وعلى حين غفله منها

هذا صار جواله يتاغر من رسايل الراقصات والكاسيات العاريات

الشخص هذا ماله في الاغاني ,,والاغنيه الوحيده اللي خايف انه يحاسب على سماعها

هي سارعي للمجد والعلياء

الحين صارت تجيه مقاطع رقص على اغاني رابح صقر وعيضه المنهالي

 مع انه  قبل الرسايل المجانيه كان يحسب عيضه المنهالي راعي معرض سيارات  

آثار ايجابيه متفرقه

من الاثار الايجابيه ان السايل هذي علمت البعض وشلون يقرا النكته اللي تجيه

بعضهم اذا جا يقرا عليك نكته من جواله يحسسك انه يقرا قصه من كتاب الهجاء

يقراها بالفصحى وهي عاميه  

 

 

قال شرهتكم على اللي شاف المباراة)

يقراها كذا :

( محشش سألوهو ويش رأيوكا في تسلل الحوثيينَ على السعوديه؟

فقالَ شرهتوكوم على اليي شافَ الموبارتو)  

---انها علّمت بعض الشياب وشلون يعرفون يكتبون رسالة جوال

اعرف واحد كان يعاني الامرّين لين بغى يستخدم الحروف اللي ما تجي من اول ضغطه,,

مره بيرسل رسالة تعزيه يبي يقول

( عظم الله اجركم)

بعد ثلث ساعه من المحاولات والسب والشتم في اللي صنع الجوال

واللي باعه عليه واللي اشار عليه يشتريه

قدر يكتبها

(ططف اففن اجدفف)

 

 

 

 

 

 

 

 

 

هيتونا فيذا