وبعد مرور سنه ونص على عمل زيد ونايف في محلات مكياجي

و8 شهور على عمل ماهر معهم

نايف اصبح ماكيير محترف  , وحب الشغله اكثر من اصحاب المحل انفسهم

وزيد ما زال يسأل نايف عن كل شي ومازالت نفسه مهيب قابله الشغله ,

و اصلا الشغله نفسها ما هظمته

وماهر ماشي حاله  بس مشكلته عصبيته وكثر طقاقه مع الزبونات

وفي يوم كانوا الثلاثه الشباب مجتمعين في بيت نايف

قال زيد :

اقول يا شباب انا بصارحكم بشي في نفسي مبطي

يا جماعه انا مانيب اذوق النوم

يا عيال انا تعبت نفسيتي وصرت انتف شعر راسي

قال ماهر : باللهي تيقدر تينتف شعر راسك  الناشف هادا؟

يا راجل قول كلام غير هادا !!

الا إزا كنت تستخدم زراديه

قال له نايف : والله العظيم جعلي اموت اني صرت انتفه

قال نايف :

طيب وش السبب وش مكدرك؟

لاتكون تحب من ورانا ؟

قال زيد :

لا يا نايف الحب ما عاد لي فيه  شف او راده على قولة فهد ابن سعيد الله يغفر له..

الحب تركته من ثاني متوسط يوم

تركته بعد اول وآخر حب بحياتي.. قماش بنت خالتي

تركت الحب بعد ماحصل لي اتزوجها

قال نايف :

اكيد ابوها مهوب مزوجك وانت توك بزر في ثاني متوسط

وهي بعد اكيد ما وصلت سادس ابتدائي

قال لا ما كانت في سادس

يوم احبها كنت تدرّس سنه سادس ابتدائي

 ومعرسه وعندها ثلاثة بزران

ماهر طارت عيونه وقال :

يا راجل يا اللي ما تيستحي .. وتقولها كمان بالفوم المليان قودامنا

في سنه تاتي متوسط وتحب ست قد أومك ومتزوجه كمانا

قال زيد :

ايه ياخوي هذا قلبي وش تبيني اسوي فيه تبيني اشب فيه

 قال نايف : طيب كيف حبيتها وليه؟ 

رد زيد بصوت كله الم وحسره وقال :

ياخوي روّحتني امي لها تدرسني قواعد ,,

وكانت تقعد جنبي تدرسني

 صح احيانا تكون ريحتها  ياكشنه

 والا خامرتن كشتها بزيت علشان تهظم

لكن كان عليها جمله اسميه تخقق اللي ما ينتخقّق

 وجمله فعليه تتدوخ اللي ما ينتدوّخ

قالت لي مره ضع كلمة زيد في جمله اسميه ؟

قلت لها : ما اعرف ..وانا اتسذب اعرف..

 بس ابي اسمع منها اسمي في جمله اسميه

قالت طيب انا بحط اسمك في جمله بعدين حطه انت ..اسمع

"زيدون ولدون رائع" 

هي قالت رائع ويحمر وجهي

قال ماهر : بطل بكش ياواد ,,

لو مديتك بالشبشب على وجهك قسمن بالله ما يتغير لونو الاشهب هادا

قال زيد : اقول على تبن بس وخلني اكل لكم قصة حبي

اقول لكم وصارت جملتها الاسميه تتردد في اذاني

"زيدون ولدون رائع "

وكلما قعدت لحالي وذكرتها وهي تقول زيدون ولدون رائع

 يقوم قلبي يردَع يردَع , ويتصبصب عرقي واروح لكتاب القواعد واحضنه

وفي يوم لا عاده الله من يوم..

قالت لي  ضع زيد في جمله فعليه؟

 قلت ما اعرف ضعيها انتي

قالت :

 "يحب زيد مادة القواعد حبا جما"

 قلت : اي بالله والله اني احبها

 قالت طيب ضع كلمة زيد في جمله فعليه

  قلت لها من عيوني

يوم قلته كنها كشّت مني شوي

 قلت :

"يحب زيد تدريس قماش واجد"

 قالت جملتك  صح بس كلمة واجد مالها داعي يا زيد

 غيرها وقل :

 يحب زيد والديه حبا جما

 قالت لها : 

يحب زيد والديه ومدرسته قماش بنت خالته حبا جما

 يوم قلت تسذا راحت تركض جوا وروحت زوجها

  اللي جا  ومسكني مع اذني وقال لي :

اقول الله يصلح خذ كتبك واقلامك جعلك تسقط  ورح لاهلك

همّن زرقني مع الباب وحرمني من شوفة قماش وخلاها ما عاد تدرسني

وخلاها بعد تغطى عني..

وبس هذي قصة حبي الاول والاخير

قال نايف :

والله ما ينلام زوجها لو توطى ببطنك

بس الشرهه عليه اللي مخليها تدرسك وانت شنبك خاط في ثالث ابتدائي

طيب ما عاد  حبيت غيرها؟

قال زيد : الا حبيت بنتن ثانيه

قال ماهر : بلا بهلله يا واد

دوبك قولتّالنا انك بعد حبك لقماش مدري قطن

مدري ايش ما حبيت أي بنت بعد كدا

قال زيد.. ياخوي نسيت ,,الواحد ما ينسى؟

قال ماهر : طيب مين هيّا اللي حبيتها ؟

قال بقول لكم بس قسم بالله لو تعلمون باقي العيال عن قصتي

لالعن جدفكم ثنينكم

قال ماهر: اصحك تسوب جدفي يا اهبل؟

سوبني بس جدفي اصحَك تسبو لا اتفاهم معاك

قال نايف لماهر: طيب تعرف يا ماهر وشهو الجدَف؟

قال ما هر : لا ما اعرف ايش هوّا بالزبط,, بس اكيد انو واحد من ابائي واجدادي

قال نايف : أبائك واجدادك؟ منتب عاقل يا ابو جهل

اقول بس ..قل قصتك يا زيد ووعد ما نفضح بك

قال زيد.. طيب بقولها

  يوم اني في ثاني ثانوي ,,

كنت عند اشارة شارع المدينه مع شارع الابراج

 وكنت فاصخ الطاقيه وبلتثتني بنت

وادق عليها وترد بذاك الصوت اللي يغرف القلب

قالت انها لمحتني تو عند الاشاره وخقت معي ,, خاصه شعري

تقول انها تذوب في اللي شعره يابس ..مدري وش جايزن لها فيه

وقالت انها تبي تتعرف علي

قلت لها عاد انا معيي ,,انا بعد ودي اتعرف عليتس

بس اصبري شوي 5 دقايق وازهم عليتس

وامر بقاله بشحن جوالي وافتح بوكي ومالقيت فيه الا 57 ريال

السبعه حقتي وال50 ريال كان ابوي معطنيها اشتري بها خضره ,,

قرع ولوبا وبيدجان

وضاق صدري وقعدت اقول وش اسوي؟ وشلون اكلمها ؟ وش الحل؟؟؟

همّن قلت.. بعد ابوي الله يهديه عاد هو لازم ياكل بيدجان والقرع كل يوم ؟!!

واقوم واشحن ب50 ريال

وادق عليها واقعد اسولف معها وهي تكركر وتضحك

لين ما عاد بقى من ال50 الا 7 ريال

قلت لها اقول ترا شحني خلص

 بتصل على الوالد يشتري لي شحن بالف ريال همّن ازهم عليتس..

 وانا ازمر عليها.. والا انا لو يعطيني ابوي الف للعيد قلت انه خذرف

واقفل وارجع للبيت ..قال ابوي وين الخضره

قلت الخمسين طاحت مني يا يبه وهذا انا راجع ادورها

قام يلعني ويدعّي علي وقال لاخوي رويشد يروح يشتري

ابوي ما يهناه النوم الا لين يتأكد ان الثلاجه مليانه بيدجان ولوبا وقرع

شوي وترسل لي البنت  رساله تقول اشتقت لك حبيبي

ودي اكلمك بس شحني خلص

رديت عليها وقلت

جعلتس  مير الطاعون الحين انا اللي محاتسيتس بثلاثه واربعين ريال

وانتي اللي يخلص شحنتس

لا وانا اخوتس انتي شكلتس داخله على طمع

وما عاد ارسلت لي شي واقعد شهر اهوجس فيها

وكل يوم ارسل لها وتسفهني

اخر شي ارسلت لها وقلت:

ردي علي تراني احبتس ومشتاق لتس

شوي وجتني رساله:

جعلك الحبه اللي تنبت في مانيب قايل

انا ولد يا ثور ..حاولت اخرفنك ادور وراك شحن لقيتك منتف

اجل بيشحن لك ابوك بألف ريال يا ولد صالح كامل

انقلع الله يقلعك انت وعرادتك

وبس هذي قصة حبي الثاني من بعدها تركت الحب

قال ماهر:

 طول عمرك اهبل يا زيد

 قال زيد..على تبن بس ,,

 شاف زيد انه كب العفش قام وسأل نايف وقال له:

 طيب يا نايف انت عمرك ما حبيت؟

قال نايف الا وما زلت اعيش قصة حب الى الان

قال زيد منهي وش اسمها؟ طخما والا شينه؟ سمينه والا معصقله؟

قال نايف :

وش رايك اخليها تعرض لك على المسن وتأكد بنفسك؟

قال زيد وش المسن؟

مسن الستاتسين؟

قال نايف :

لا ياخوي وش سكاكينه .. المسن هو المسنجر

قال زيد: الماسنجر حق الحاسب الالي؟

قال نايف لا المسنجر حق الوطنيه

قال زيد: تنكت انت ووجهك يا الاملط؟

المهم بس يعني بتخليني اشوفها ..

قال نايف مهبول انت؟؟

اخليك تشوف البنت اللي احبها وبتزوجها؟

قال زيد: اقول خل عنك الحتسي

 عاد هو به احدن يحب وحده ويتزوجها؟

قال نايف اجل يحبها وياكلها؟

قال زيد لا ياخوي بس الحب ما يطري على الواحد الا وهو في الطعش

ولين كبر عقل همّن اعرس

قال نايف :

اردى منك من يحاكيك ويناقشك في الحب والغرام

قال ماهر:

بالهي عليك يا نايف انتا بتحب وحده وناوي تتجوزها؟

قال نايف : ايه  ان شاء الله

قال مين هيّا هادي؟

قال نايف بعد انت يا ماهر عاداك ذا القروي؟

قال ماهر:

لا يا راجل.. لا عاداني ولا عاديتو الله لا يجيب العادوه بيننا

احنا كل هرجنا مزح

قال زيد: وانت يا مويهر ما تزد حبيت مثلي انا ونايف؟

قال نايف: انت الى الان مسمي خقتك مع المدرسه حب؟

ماهر طق التنهيده وقال :

آآآآآآآآه ليه بس تقلبّو عليّا المواجع يا عيال !!

انا عشت احلى قصة حب ممكن يعيشها البني آدم

قال زيد: لعن بليسك يا تسذبك ..من خبرتك وانت ما في قلبك الا الاتحاد

قال نايف : يا زيد اص خل الرجال يعلمنا

كمل يا ماهر ..

قال ماهر:

انا حبيت واتجوزت وانبسطت ..واكتر من بنت كمانا

قال نايف:

والله منتب بسيط يا ماهر

وتربّع نايف وزيد ذب الكنترول من يده

وكلهم تركيز مع ماهر وقصص حبه

قال ما هر:

ايشبكم انفجعتو كدا

المهويم..

انا حبيت اخت احمد جميل سنتين ونص

واتجوزتها وعيشت احلى ايام مع ابو جميل

وحضرت معاه كل المباريات وكنت اشد من ازرو

لحد ما اصيسب واعتزل

وما زال زيد ونايف طايرتن بوهتهم من سوالف ماهر

وكمل ماهر قصص حبه وقال:

بعدين حبيت اخت حمزه ادريس ..

وكان حبي لها اكتر من حبي لاخت احمد جميل

وكنت متفق انا وهيّا ازا انجبنا ولد نسميه قول

قال نايف وش ذا الاسم الغريب؟

قال ماهر :

اييوه علشان حمزه لقبو حمزه قووول

فحبينا نسمي الولد قول

 والولد التاني نسميه البرق

قال زيد : وش البرق بعد؟

قال ماهر: هادا لقبو الاساسي يا اهبل

المهويم..اني عيشت معى ابو موفّق احلى الايام

وخلال حبي لاختو حقق لقب هداف الدوري

لحد ما تعاقد الاتحاد مع الحسن كيتا

وبدا قلبي يميل لاختو وحست فيني اخت حمزه وزعلت مني وسيّبتني

ولماّا سيّبتني حبيت اخت الحسن كيتا واتفقنا على الجواز

لكن الله يهديه بس عمل عملتوا القبيحه قودام خادم الحرمين

وطردوه هوّا واختو من البلد

قال نايف:

من جدك انت تزوجت اخت احمد جميل وحبيت اخت حمزه وكيتا؟

قال زيد : لايهمك ذا التسذوب

قال ماهر : سزوب في عينك

واللهي ما اكزيب

انا فعلا حبيت اخت احمد جميل واتجوزتها وحبيت اخت حمزه وما حصل نصيب

وحبيت اخت كيتا وطردوهم الحكومه علشان الهلال فريق الدلال

بس كول هادا كان في الخيال

من كتر ما كنت احوب الاتحاد ولعيبتو

قال زيد:

يا ليتك والله معرسن على اخت رضا تكر

علشان لين زعلتها انبرش عليك لين يكسمر رجليك مثل مجرشي

قال ماهر :

ما اكثر هرجكم يا الشروق

دحين انتم دخلتونا في الحب والكلام الفاضي ونسينا موضوع زيد الاهبل

 هوا بيقول انو بينتف شعر راسو وانو نفسيتو تعبانه

وما قال لنا السبب؟

قال نايف :

ايه والله صدز وش فيك يا زيد؟

قال زيد : السبب يا عيال اني مانيب مرتاح اني اشتغل في محل مكياج

حتى لو ابوي موافق , بس عجزت اهظم نفسي وعجزت اتعلم

وصرت ما اروح للحوطه ابد

اخاف احد من اهل الحلوه يسألني وش اشتغل

قسم لو اقول له اني اشتغل في محل مكياجي ان يطقني

قال ماهر :

تيبغى الكلام الجد.. واللهي معاك حق

ايش رايكم بس نفصل من ذا الشركه

ونشوف لنا شغله ثانيه

قال نايف :

بتفصلون افصلوا

انا عن نفسي مرتاح للشغل ولقيت نفسي فيه

قال زيد:

وانا عاد احس اني مضيعن نفسي في ذا الكحل والشخاميط

قال ماهر وانا واللهي ضيعت نفسي مع واحد مايع وواحد اهبل

قال نايف:

طيب لو فصلتوا وش بتسوون؟

قال زيد بيرزقنا الله

يالله يا ماهر يالله خل نسري بس ترانا صّيفنا

قال ماهر :

انا نسرك وانتا الببغاء حقيّ

قال زيد,, اقول قم بس جعل ثمك يدَق بحصاة

استمروا يشتغلون في مكياجي وفي نفس الوقت يدورون شغل

لكن للاسف ما لقوا شي..

في يوم قال ماهر لزيد:

ايش رايك يا زيد اكلم  اومي واخليها تبيع حاجه من الدهب اللي مالو لزوم

وتدينني قيمتو سلف ,,وكمان اتسلف من خالي

وانتا تقول لابوك يسلفك مبلغ حلو

ونشوف لنا مشروع نلقط فيه رزقنا؟

قال زيد:

الله يرحم الحال يا ماهر

انت مير الوالده عندها ذهب ,,وخالك عنده خير ماشاء الله كان

اما انا ,,اذا كان ابوي بايعن ذهب امي وشلون تبيه يسلفني؟

لكن بقعد معه ومع اخواني وبخليهم يجمعون لي مبلغ

طيب وش مشروعك ؟

قال ماهر :

مشروعي محل للخضار والفواكه

وانا جا على بالي المشروع هادا لما كنت تحكي قصة الولد اللي خرفنك

وانك متعود تشتري الخضار والباذنجان لبيتكم

صح انتا بتفهم في اختيار الخضار والفواكه ؟

قال زيد: ايييه من خبرت نفسي وانا اشتريها

واعرف انواع التمر بعد

قال ماهر:

يا اهبل يا اهبل..لما انتا بتفهم في الحاجه هادي

ايش اللي خلاك تيشتغل في محلات مكياج وكلام فاضي

من الاول فتحت لك محل خضار وخلاص؟

قال زيد : عاد انا معيي؟؟

بس وين الدراهم وانا اخوك

قال ماهر خلاص انتا حاول تدبر اللي تقدر عليه

والباقي خليه على الله ثم عليّا انا

وراح ماهر لامه وقال لها :

يرضيك يا ماما الحال اللي انا فيها ؟

قالت ايش الهرجه يا واد؟

قال :

اخويا رامي واتعين في مستشفى براتب حلو ما شاء الله

واختي تهاني قربت تتخرج واكيد حتلاقي لها وظيفه في المستشفى

انتي  شايفه حالتي انا دحين قربت ادخل منتصف العشرينات

وماكونت نفسي ..كيف حتجوز ؟ كيف حكون اسره صغيره؟

قالت امه :

طيب ايش في يدي اعمل لك؟

قال ماهر:

لا انتي في يدك وفي رقبتك وادانك كمانا

قالت امه:

واللهي ماني فاهمه حاجه يا وَلَدي

قال :

انا وصديقي زيد اتفقنا اننا نفتح محل حضر وفواكه

هوا بيفهم كتير في الشغله هادي ..وانتي عارفه انها فيها مكاسب كبيره جدا

قالت امه:

طيب وانا كيف اساعدك؟

اجي ابيع معاكم حبحب مسلا؟

قال ماهر : انتي بتتريقي عليا يا ماما هاه؟

لا انا ابغى تسلفيني مبلغ وأول ما ينح مشروعنا انا ارجعهو لك

قالت : منين يا ولدي انتا عارف الحال العين بصيره واليد قصيره

قال اييييوه انا عارف الحال

والعين بصيره بس يدك فيه الخير والبركه ورقبتك وآدانك كمانا

قالت امه: ايش حكايتك مع يديني ورقبتي؟

قال انا اقصد تبيعي حاجه من الدهب اللي عندك

او تتسلفي من خالي مبلغ 30 او 40 الف

ابدا فيها مشروعي وسنتين تلات وارجعهو لك وفوقو بوسه على راسك يا احلى اوم

قالت امه : اهااااا .. طيب سيبني افكر واستشير خالك وارود لك..

اما زيد  فراح لابوه وقال له :

ابيك يا يبه في موضوع مهم

 قال ابوه : وش تبي ,,عساك بتفصل من شغلك؟

قال زيد: افا يبه غيرت رايك في شغلي؟ هماه كان جايزن لك من اول ؟

قال ابوه : أي بالله جايزن لي.. انا انشدك كانك بتفصل ليني اشتغل متسانك

قال زيد: ويييين تشتغل متساني الله يعظم اجرك

اللي ما جزت لهم انا بتجوز لهم انت..

قال ابوه: ما ينلامون انك ماجزت لهم

اللي ما جزت لي انا يا أبوك وطالعن من ظهري

اقول بس انهَج وقل لي وش تبي؟

قال زيد :

انا فعلا بفصل من الشغل ..واتفقت انا وخويي ماهر الحجازي

نفتح لنا محلات خضار وفواكه

انا افهم فيها والبركه فيك يا يبه من كثر ما اشتري لك بيدجان وقرع ولوبا

وماهر ولدن شقردي شرواك يبه

قال ابوه : شرواك الطيب وانا ابوك

بس وانا ابوك المحل يبي له دراهم ..وين بتجيبها منه؟

زيد حس ان رد ابوه يعني اغسل يدك اني بعطيك

قال :

وين بجيبها منه يا يبه..الله لا يخلينا منك..

ادري يا يبه انك ملحط ووالدراهم اللي تجيك من الشونه

 ومن اجار بيتنا اللي في الحوطه  تروح كلها في بيدجان ولوبا

انا ابيك تكفلني انت واخوي عند عمي علي  اتسلف منه 25 الف

وبعد سنتين ابدا اسددها لها على اقساط

قال ابوه :

الا ورا ما اقول لاخوانك الكبار يتقاطون لك

ومهوب لازم ترجعها لهم

قال زيد:

وش ذا الاخوان  الكبار

الله واكبر يا محمد السعد العجلان واولاده

اخواني كلهم ملحطين ..

يا يبه هذولي ما تكثر انتدابتهم واعمالهم

الا لين قلنا لهم ودنا نتقاط ونتجتمع  في استراحه

مدري وش ذا الانتدابات اللي يوم الخميس

ومن زين وظايفهم علشان ينتدبونهم

مثلا رويشد قهوجي..وش بينتدبونه وزارة الحج يزين في تبوك ؟

لا يا يبه ما لي الا الله همّن عمي

قال ابوه : والله انك صادز الله يخلف علي بس

الناس عيالهم ضباط ودخاتره وانا ما افلح فيكم احد

 طيب وانا ابوك ما يكون الا خير

وراح زيد وابوه لعمه علي

علي هذا هو أخ اصغر لابوك يا زيد , ويعتبر اغنى واحد في العائله

عنده محل تمر في سوق خضار عتيقه ومحل في سوق خضار البديعه

وهو بعد كبير الدلالين في حراج التمر ,

 اضافه لوظيفته في السكه الحديد ميكانيكي فرامل القطار

فهو  بالنسبه لعائلة زيد يعتبر رمز للثراء الفاحش

مثله مثل سعد الحيري بالنسبه للبنانيين

يوم راحوا له .قال ابو زيد:

انا جايك انا وزيد في ماضوعن مهم

قال علي:

آمر ياخوي

قال : ما يامر عليك عدو وانا اخوك

انت خابرن زيد ما افلح في الدراسه , ولاافلح في الوظايف 

وحتى الشغل في محلات الكحل والبودره حقة الحريم ما افلح فيها

وزيد يتحنطّم ما جاز له ابد اسلوب ابوه

قال علي: طيب وش تبيني اسوي له؟

تبيني اوظفه في السكه الحديد؟

قال ابو زيد: لا وانا اخوك من زين وظيفتك انت

لولا الله همن ذا التمر كان صرت مثل زيد واقعد ادور لك احدن يفزع معك

لا زيد ما عاد يبي وظايف..بيجرب حظه في التجاره

وعنده مشروع هو ورفيتزن له بيفتحون محل خضار

نبيك تسلفه اللي تقدر عليه وانا واخوه راشد بنكفله

قال علي:

 من ناحية الكفاله مالها لزوم ..انت اخوي التسبير وتامر على رقبتي

ومن ناحية السلف.. ما اقدر اسلفه اكثر من خمسة الاف

قال ابو زيد: الله يهديك وانا اخوك.. اقول لك مشروع وتقول خمسة الاف؟

الخمسة الالف ما تفتح له مشروع بسطَه

ابك تسلفه اقل شي 25 الف

وبيبدا يسددها لك بعد سنتين وان كانهم ما توفقوا

بيبيعون المحل وبيعطيك حقك

قل تم..