وابتدا زيد وماهر مشروعهم التجاري
واشتروا ددسن غماره يحملون فيه البضاعه
وجابوا عامل بنغالي يساعدهم في المحل
وصار زيد يقوم من قبل صلاة الفجر ويروح لسوق الجمله يشتري الخضار والفواكه
واذا جاب البضاعه راح للبيت ونام الى صلاة الظهر
وماهر يتواجد في المحل من الساعه 7 الى صلاة الظهر
ويروح للبيت الى بعد العصر
ومن العصر الى الساعه 12 يتواجدون اثنينهم في المحل
وطبع زيد اعلانات كثيره ما بقى محل ما حطها عنده
لدرجة انه نشب في حلق نايف انه ياخذ كميه من الاوراق
علشان يوزعها بالخفيه على زبونات مكياجي
لكن نايف اخذه على قد عقله ويوم طلع من عندهم شققها
وبدا المحل يكون زباين شوي شوي بسبب النوعيه الممتازه
من الخضار والفواكه اللي يجيها زيد وبسبب اسعارهم وترتيب محلهم
لكن ماهر ما زال مستمر على طبعه العصبي وعلى عيارته الحجازيه
في يوم جاه زبون من جماعة زيد ..
دخل للمحل وقال :
السلام عليكم؟ زيد فيه؟
قال ماهر وعليكم السلام
لا زيد مافش..
ما تيبغى اديك خيار بدالو؟
قال الرجال: وش قصدك يا التسلب ؟
قال ماهر:
قسم بالله امزح معاك ياهوووه
قال الرجال : انت تعرفني عشان تمزح معي
انت حدك صبي من صبيان ولد خالي زيد
قال ماهر : صَبي في عينك انتا وزيد
انا شريك معاه لي في المحل زي اللي له
قال الرجال:
اجل انت شريك !!!
منتب بسيط يا موبايلي الشريك الاستراتيجي للهلال
قال ماهر :
حوطي وهلالي كمان ؟؟لاحول ولا قوة الا بالله
قال الرجأل :
المهم بس انهج علينا مانيب فاضين لك والا تسان سنّعتك
قال ماهر : تسمّعني ايش؟
قال الرجال : انّا لله ..وش اللي ابلش يازيد يا ولد خالي فيذا البثر
قال ماهر :
انتا زعلت؟
آآآسف واللهي كنت امزح معاك
طيب ايش طلباتك ؟
قال : عطني كيلو حبحر خكري ...
قال ماهر : ايش اللي حبحر خكري وحبحر جنس تالت
انتا جاي لمحل خضار وفواكه والا محل دعاره؟
قال الرجال : يالله جعل ذا الفاقوش تسانه ادوخ راسي
ياخوي حبحر خكري يعني حبحر بارد ..
قال ماهر :
قسم بالله عليكم اسامي انتم يا الحوطيين ما اعرف منين تجيبوها
يا اخي اهرج زي الناس وقول فلفل بارد ..مو تقل لي خكري وماني عارف ايش
الله يوستور لا تجيني وحده حوطيه وتقول عندك عندك كوسه بويَه
قال الرجال :
اقول اهوف بس الحبحر وانتزلع بس
وطلع من المحل
ناداه ماهر وقال له :
تعالا يا واد ..يعني ايه اهوف؟
اهوف انتا وزيد واهلك كلّهم
واللهي لو عرفت انها كلمه بطّاله مايحصل لك طيّب
وسفهه الرجال وركب سيارته وراح
ومع مرور الايام بدا المحل ياخذ وضعه ويكثرون الزباين
خاصه من بعد المغرب..علشان كذا يتواجدون في المحل اثنينهم
معظم الزباين هم من اهل الحاره اللي اكثرهم من نجد
وطبعا منهم كثير من ربع وجماعة زيد
وبما ان بيت ماهر بعيد عن المحل واقاربه اكثرهم في جده
فنادرا يجي زبون لهم من جماعة ماهر
النقطه هذي اثارها ماهر مع امه وقال لها:
ايش هادا يا اومي
كل الزباين اللي بييجو للمحل كلهم اما حوطيين او شروق
ومافش ولا زبون من ارحامي او من اصحاب ابويا الله يرحمو
او من صاحباتك او اصحاب خالي
قالت امه:
الله يرضى عليك يا وَلَدي ..انتا تيبغى الجماعه يمشوا المشوار البعيد هادا
من الربوه الى ماني عارفه ايش اسمو الحي اللي فيه دوكانكم
علشان يشتروا بَصَل والا جَزَر ؟
قال ماهر: وجماعتك وصاحباتك ارانب عشان ما يشتروا لا جزر يا اومي؟
ما احنا بنبيع بورتوقان وشمام وبطيخ وكيوي وكول حاجه
قالت امه خلاص انا راح اعمل لك دعايه عند كم وحده من صاحباتي
وبعد كم يوم .. دخل عليهم زبون وقال:
السلام عليكم ..
هادا محل خوضار ماهر ؟
شافه ماهر وقال ...اييييوه هادا محل ماهر للخضار والفواكه
قا له زيد في اذنه:
اقول جعل وجهك يتفّل فيه .. الحين المحل لك بلحوووولك؟
قال ماهر : أسكوت يا زيد بعدين نتفاهم..
والتفت على الحجازي وقال له :
اتفضل ايش طلباتك .. احنا عندنا اطيب انواع الفواكه
واجود انواع الخضار ,, واسعارنا مافش اقل منها في محلات الخضار والفواكه
قال الرجال : ماشاء الله تبارك الله
والله وكبرت يا ماهر وصرت تيعرف تبيع وتيشتري
الله يرحم ابو ويجعل مثواه جنات النعيم
قال الرجال : انتا اللي بتجيب البضاعه من الحلَقه يا ماهر؟
قال ماهر : لا والله ,,الكزب خيبه يا عم
اللي بيجيبها الاخ زيد ,,انا مشغلو عندي لانو بيفهم فيها
تعرف هوا حوطي والحوطه بتكثر فيها المزارع
واهلها شاطرين في موضوع الزراعه والكلام هادا
زيد وده يدوس ببطنه بس مستحمل
ما يبي يسبب مشكله ويروح الزبون ما اشترى شي
قال ماهر للرجال :: اييوه ايش طلباتك
برتوقان والا موز والا خوضار ؟
قال الرجال :
ايييوه يا ولدي انا ابغى حاجات كتيره ..
أديني نص كيلو طماطم
ونص كيلو بصل ابيض
وربع كيلو فلفل
وحبة خس وحده
زيد طاااارت بوهته من ذا الحاجات الكثيره اللي يبيها
وكمّل الرجال وقال :
ونص كيلو برتوقان وكيلو موز ونص كيلو تفاح
بس خلاص
زيد ما تحمّل وقال لماهر بصوت خافت:
هقوتي ان ذا جاي يتقضى مقاضي حقة سندويشة شكشوكه وحده وكاس عصير مشكّل
قال ماهر وهو يضحك على ذبة زيد:
ايووه ياعم ..
خلاص ما تيبغى حاجه تانيه؟؟
والا انتا كدا اسرفت في المقاضي؟
قال الرجال: يا راجل الفلوس تروح وتيجي
اهم شي الصحه والسيره الطيبه
وان الانسان ما يحرم نفسو ولا اولادو في حاجه
قال ماهر للعامل يجهز طلباته
واعطوه اغراضه في كيستين
وحاسبهم ب 17 ريال وطلع
يوم طلع مسك زيد ماهر مع اذنه وقال :
ما تقول لي يا التسلب يومك تتسذب و تقول لقريبك اني اشتغل عندك؟
قال ماهر سيب أداني يا زيد سيبها بلا فشكلك
وفلت زيد اذنه وقال ماهر:
يا زيد يا زيزو يا حبيبي
الزباين كلهم من ارحامك وجيرانك واهل منطقتكم وبلدكم الرياض
وانا فين وفين لما ييجي زبون من اللي يعرفني او يعرف اهلي
فمعليش لو اتبهللت عليه حبتين واتفشخرت تلاتا حبّات
قال زيد : طيب بس لا عاد تعوّدها همّن اغولك
قال ماهر :
تغولني هاه؟
انتا قد الكلمه هادي يا واد؟؟
جرب وشوف اللي يحصل لك ..
قال زيد : انت سفيه ما تنتواخذ ,,الله يخلف على اميمتك بس..
وفي يوم جتهم زبونه كبيره في السن شوي
ومعها سواقها ودخلت للمحل وما كان فيه الا ماهر
وقالت له تعال يا ولد
عطني جحتينن حمر وسحّارة جراوَه وطابوق تفاح
وكرتون بردقوون
وصرّتين كراث وقرعتين وصندوق بيدجووون
وعطي في باغه شوي لوبا ..و تسيسين بصل تسبيره..
يوم خلصت قال لحظه يا اومي وحده وحده عشان افهم بس
الجحتين وعرفتهم ,,تقصودي بطيختين
بس حمر هادي ايش شكلها؟
قالت :
وعّوووووووووه .. وشلون بيعرف حتسينا ذا الشامي
قال ماهر : شامي في عينك يا اومي..
واللهي انا سعودي بس فهميني وحده وحده
قالت الحمر يعني ابيها حمرا وحاليه مابيها بيضا ومالغه
قال ماهر مع اني ما اعرف ايش المالغه هادي لكن خلاص عرفت طلبك
طيب ساحرة الجراوه هادي ايش تطلع؟
قالت : وانا ما عندي شغلن الا انت , اقعد اتزابلك فيذا واعلمك ..؟
يا رجّالن جهز اغراضي والا بروح لمحلن ثاني
اكثر مابه محلات الخضره
قال ماهر لا لا يا اومي استّني شوي
واتصل ماهر على زيد وقال له :
يا زيد عندي زبونه كبيره في السن من جماعتكم
و تبغى مقاضي وما فهمت هرجها
راح اسئلك عن حاجات وعلمني أي شكلها وبسرعه لو سمحت
ايش ساحرة الجراوه ؟
قال زيد سحـّارة جراوه الله يقلعك .. يعني صندوق جراوه يعني شمّام..
وقال ماهر للعامل يا عبد الحميد هات صندوق شمام للزبونه
ايوه يا زيد
وايش هادا في باغه شوي لوبا؟
اللوبا هادي زي السوبيا ؟
قال زيد لا ياخوي هذي اللوبيا مدري الفاصوليا
هذيك الخضرا اللي كنها دود مدرّج ..
عطها شوي يعني ربع كيلو في كيس بلاستيك
قال ماهر اها عيرفتها خلاص
طيب يا زيد .. وايش هيّا تيسين البصل السبيره
فيه بصل ييجي على شكل تيوس؟
قال زيد لاحل ولا قوة الا بالله
ياخوي هي تبي كيسين بصل كبيره
قال ماهر باللهي؟؟
التيسين يعني كيسين ؟
الله يكشف حالكم يا الحوطيين
الصندوق قلبتوه ساحره
والكيسين عملتوها تيوس
واعطاها ماهر طلباتها وراحت وهي تحمّد الله وتشكّره
ورجع ماهر واتصل على زيد وقال له :
تصدق اليوم اخذت كورس طيّب في اللهجه الحوطيه
بس باقي كلمه وحده ما فهمتها
كلمة مالغه ؟
ايش معناها يا زيد؟
قال زيد معناها سامجه؟
قال يعني ايش سامجه؟
قال يعني ماصله
يعني ايش ماصله؟
قال زيد يعني مهيب حلوه الله يمصلك..
قال اها مالغه يعني مو حلوه؟
قال زيد ايه يعني مالها طعم
قال ماهر : يعني ازا كانت الحاجه مؤنثه نقول عنها مالغه
وازا كان مزكّر نقول عنه مالغ صح؟
قال زيد ايه الله يمصلك
قال طيّب انا قرب دوامي يخلص
هيّا ارجع بسرعه للمحل يا راجل يامالغ ..
واستمر زيد وماهر في نشاطهم وحماسهم وزباينهم في ازدياد
وصار زيد يجيب تمر من الحوطه ويبيعه في المحل وهذا زاد في مبيعاتهم
لانه يبخص التمر ولان التمر الطيب له سوقه
وبعد مرور سنه صار المحل يحقق دخل يومي ممتاز
وصار اهل الحاره يثقون في بضاعتهم واسعارهم وصراحتهم
وانقطعوا عن نايف لانهم ما صاروا يفضون ابد واذا قفلوا الساعه 12بالليل
يصيرون دايخين و يروحون ينامون
اما نايف مع انه صار مدير احد فروع مكياجي وزادوا راتبه وصار 6 الاف
الا انه يمر عليهم في المحل كل فتره ويقعد يضحك على طقاقهم
بس هم يستغلونه ويخلونه يبيع معهم مع ان ماله في ذا الشغله ابد
وفي مره من المرات اللي زارهم فيها كان عندهم زباين كثير
وما يلحقون على الطلبات لا هم ولا حتى العامل
ونايف قاعد على كرسي وحاط رجل على رجل
ومعه عنقود عنب ياكل منه حبه حبه
يوم شافه زيد قال له :
اقول يا نايف وراك ما تحط ذا العنب اللي تاكله تسنّك تاكل لك ورده
وتجي تعاونّا؟
قال نايف وش اعاونكم فيه ؟
وش عرفني بالبيدجان والبصل والفجل
بعدين احمدوا ربكم اني صديقكم
جاي من المحل متعطّر ولابس وكاشخ وشايف وجيه واشكال تفتح النفس
واتنزّل وواجي لمحلكم يا ذا الشيون انتم وبصلكم وفجلكم
قال ماهر :
سيبك منّو وخليه قاعد كدا زي الحيبحير الخكري
قفلت مع نايف وطلع وخلاهم
خلال السنه الاولى وبداية الثانيه كان زيد يمر على عمه علي كل يوم جمعه
يسلم عليه ,,عرفانا منه بموقفه معه يوم يسلفه ويختار لهم موقع المحل
وبعد مرور سنه وشوي راح له على عادته
وسلّم على عمّه وحب راسه ,,لكن عمّه باغته وقال له:
اقول يا زيد ..بنبطي تسذا ..؟
قال زيد : وشو يا عمي؟
قال : اقول بنبطي تسذا ..كل جمعتن تجي وتحب راسي وتلط شاهي وقهوه
ودراهمي ما عنها اخبار؟
قال زيد :
اصبر علي يا عمي
عسى الله يطول عمرك ويخلّيك ذخر
المحل ماشين سوقه زين بس يبي له شوي صبر
وانت عارف اجار وبضاعه وراتب عامل
قال عمه :
والله اني ان رفيتزي ناصر قايله لي
يقول الله يعوضك في دراهمك.. شكلها بتصير ديون معدومه
وما ظنتني ذا السبهه ولد اخوك كفو ينجح والا يصير تاجر
ضاق صدر زيد وما قدر يرد
وطلع بعد ما حب راس عمه ..
في الاسبوع الثاني راح لعمه ,,
وتوه مسلم عليه وجا بيحب راسه قال له عمه ؟
هاه وين الدراهم ؟
قال هانت يا عمي يبي لنا كم شهر واجيبها لك
قال عمه : والله ما ظنيته انها كم شهر
والله رفيتزي ناصر قايله لي ..
يقول ان ولد اخوك ذا راعي الكحله والبودره
ما ظنّيت انه بيرد لك دراهمك
شكله بيمرّجها في ذا المحل الفاشل
قال زيد: قسم بالله ان محلنا ناجح لايهمك خويك
شكله يحمَط منّي؟
يحمَط = يغار
قال علي وش يحمَط منك الله يرحم حالك !!
الله اكبر يا ذا السوق اللي ما يوقف
قال زيد بتشوف يا عمي ,,ان شاء الله عن قريب تجيك دراهم
وجا زيد بيطلع
قال عمه وين بتطس ,,وين حبة الراس وتقدير عمك اللي افضاله عليك؟
قال زيد : والله ما عرفنا لك يا عمي ان حبيت راسك قلت وين الدراهم
وان طلعت قلت تعال حب راسي
الله يقلع امها حاله
وحب راسه من غير نفس وطلع..
وقعد زيد كم شهر ما راح لعمه لانه يدري انه بيغثّه ويسفّل فيه علشان الفلوس
قال خلاص اذا اكتملت فلوسه رحت وذبّيتها في وجهه وخلاص
وواصل محلهم نجاحه , ولانهم اثنينهم ما ياخذون اجازه ابد
قال زيد ..اقول يا ماهر :
ما تعبت من الشغل؟ ما اشتقت تقعد مع اخوانك والا مع خوياك؟
تدري كم لنا ما رحنا لاستراحة احد من الشباب ولا لبيت نايف
ولا لاي مكان؟
قال ماهر : الا اعرف ..دحين لينا اَشكَل من سنه وتمانية شهور
ليه ..انتا تعبت وناوي تبطل والا ايش الهرجه ؟
قال زيد :
وش ابطل انت ووجهك .. شايفنا نلعب ضومنه
لا ياخوي بس ودنا نحط يوم في الاسبوع نغير جو انا واياك
نروح مع ربعنا وجماعتنا
قال ماهر : طيب والمحل يا اهبل نسيّبو بعد النجاح هادا ونخسر الزباين؟
قال زيد لا ياخوي منّاب مسيبينه ولاش
بس بنجيب واحد يقعد فيه يوم في الاسبوع
لو من بعد العشا الى 12 بالليل
ونعطيه قاسمة الله؟
قال ماهر :
ايش شكلها قاسمة الله هادي؟
قال زيد : يعني اللي يكتبه الله من الفلوس
مية ريال والا ميه وخمسين
قال ماهر : طيب لازم يكون واحد نثق فيه مو واحد ييجي و يسرقنا
قال زيد اكيد مافيه شك لازم يكون ثقه
علشان كذا بجيب ولد خالتي رايد يمسك المحل
كل يوم خميس من بعد صلاة العشا لين 12
قال ماهر :
ولد خالتك قولتّا للي اسمو ايش؟
قال زيد : اسمه رايد ,,يعني رائد
قال ماهر ,,باللهي ابن خالتك اسمو رائد؟
اكيد امو ليبنانيه والا سوريه؟
قال زيد :جعل النقَر يخفّس ضلوعك ,,اقول لك ولد خالتي وتقول لبنانيه؟
قال ماهر : ايييوه صح ,,
النقَـَر هادا ايش شكلو؟
قال زيد : النقـَر دعوه طيبه يدعيها لي ابوي لين مافهمت شي
قال ماهر .ورائد هادا ولد كويس وأمين؟ والا اهبل زي ابن خالتو زيد؟
قال زيد ,,اقول الفقَـَه بس
لا الولد مايحتاج .. كويس و طيب وعاقل ومحافظ على الصلاة
ومهوب يتتن ولا يغازل ولاش
بس انه مسيكين ما توفّق في الدراسه وصل اولى ثانوي وفصل
قال ماهر : ايوووه مسيكين ,,ما طلع زيّك يا زيد
كنت مهندس بترول في ارامكو بس سيّبتها
بلا بهلله يا واد ..انتا كمان مسيكين يا زيد..
لكن ربي رحمك ويسّر امورك وخلاك تبيع ساحرة الجراوه واللوبا المالغه ...
قال زيد : والله مابه املَغ منك
وفعلا اتفق زيد مع ولد خاله رائد وصار كل خميس يقعد في المحل من بعد العشا الى 12
وماهر وزيد يروحون يغيرون جو هنا والا هناك ..
يا يروحون مع بعض عند نايف في بيته..والا كل واحد يروح مع اخوانه
بعد مرور اقل سنتين على افتتاحهم المحل
قدروا يجمعون المبالغ اللي تسلفوها ..
وراح ماهر لاأمه ودخل عليها وهي في غرفتها وطق عليها الباب
قالت ميييين؟
قال انا ماهر يا ..راح اكون حرامي مثلا ؟؟
قالت :ايش تيبغى يا ولدي
قال ماهر :ايش اللي ايش تبغى يا ولدي !!
لو كان ابويا عايش قلت اني خبّطت الباب عليكي في وقت غير مناسب
دحين انتي ارمله.. ماني عارف ليه بتقفّلي الباب عليكي!!
افتحي معايا ليكي مفاجأه
وجت امه وفتحت الباب
قال لها :
ايش هادا يا أوم رامي ..مقفله الباب عشان ايش؟
تكوني بتحبي حد بعد ابويا وبتكلميه من ورانا ؟
قالت : أنكَتم يا واد ,,
كل الريجاله اللي في البلد هادي ما يعوضوني عن ابو رامي
قال ماهر وهو يضحك : طيب واللي في البلاد التانيه ؟
قامت ودزته وقالت : انتا ما تيستحي يا واد؟
هيأ اندُور من من غورفتي وسيبني انام
قال ماهر لا مش حاندور الا لما تشوفي المفاجأه
قالت فينها المفاجأه ..اظون ان المفاجأه هيّا مزحك اللي يسم البدن..
قال لها : غمضي عيونك
قامت وغمضتها بقوه وفتحت خشتها
قال لها :
ايش هادا يا ماما انا ابغاك تغمّضي مو يغمى عليكي ..
وطلّع من جيبه ربطتين فلوس
وحده 15 الف ووحده 35 الف
وقال هيأ افتحي عيونك
يوم فتحتها قالت :
ايش الفلوس هادي يا واد؟
قال هادي الفلوس اللي اتسلفتها منك انتي وخالي
وانا دحين جاي ارودّها لكم وفوقها بوسه كمان
ايوه صح نسيت البوسه ,,واعطى امه بوسه على راسها وخدها ويدها
قامت امه تصيح وتقول :
يارب لك الحمد يارب لك الحمد
فينك يا ابو رامي تجي وتشوف ماهر وهو من تجار الحلقه
والفلوس بتجري في يدّو زي الرُز
قال ماهر: يا ماما يا ماما ..انتي بتتزكّري بابا والا بتحسديني؟
وراح زيد لعمه علي وقال له :
وشلونك يا عمي عساك طيب؟
قال طيب الحمدلله
هاه يا زيد ..وين ذا الغيبات ,,؟
مير من اول تجي تسلّم وتحب راسي وابرد قلبي شوي واسفّل فيك
الحين لا دراهمي جبتها ولا عادجيتني اسفّل فيك وابرد تسبدي
قال زيد : الله يهديك يا عمي قل لي مير وشلونك عساك طيب؟
قال عمه :
وشو له اقوله هذا انت كبر الحمار مافيك الا العافيه
وما شفتك عميان ولا تكح ولا تعطس ولا تعرج ولا فيك برص
قال زيد : وجع وجع وجعن يوجعك يا عمي
قل ماشاء الله .. ترا ابوي محذرني من وقايلن لي
صح ان عمك ماعليه ,,بس تراه نظول يطرح الطير من السما
قال عمه :
مايهبا الا انت و ,,
قال زيد منهو منهو ...قصدك ابوي؟ قسم بالله لا اعلمه عليك
قال لا مهوب ابوك ,, ما يهبا الا انت ووجهك
قال زيد : ايه خفت من ابوي,,
والله ان ابوي قايله .. يقول :
صح ان عمك ما عليه .. بس تراه رخمه
قال عمه وهو حاط يده على راسه بياخذ العقال :
اقول وراك ما تعطيني دراهمي وتقلّع الله يقلع وجهك
قال زيد: الله يهديك يا عمي يا سرعك وتحمق
وش انت تدوّر على راسك ..عقال؟
منتب تلبس عقال يا عمي
الا كانك بتطقني بطاقيتك
ولله ان ابوي قايله.. يقول لنا:
صح عمكم ما عليه ... لكنه مهوب يعرف يلبس.. لبسه مخيس و قـَطعـَة وجه
قال عمه :
المخيس انت يا الحمار يا تزليل الادب ..اها اظهر عن بيتي ولا عاد تطبّه
وباتسر بروح اشكيك تجيب دراهمي
قل زيد ؟
وراك حمقت يا عمي والله اني امزح معك
قال عمه:
كل هذا وتمزح يا تزليل الحيا ..
جعلك الجنّي يطير بك..ترا انا عمك في مقام ابوك
يومك تجي تتسلف مني كنت ما تحط عينك بعيني
وكل جمعتن مخيسني في بيتي تقهوى وتغدى من قواة وجهك
الحين يوم الله رزقك قمت تمون انت ووجهك
قال زيد ايه مير على طاري الرزق
ترا فلوسك معي وماقصرت يا عمي
جعل خيرك دايم والله لا يخلينا منك
قال عمه :
ايه اشوفه نفع فيك المعروف من جيت وانت تسيمج وتطنّز علي
قال زيد :
والله ان ابوي قايله ,,يقول عمك حبيب وراعي فزعه بس انه راعي منّه
لو يعطيك ريلين .. قعد يخيّسك سنه بالتمنّن
قال عمه : الحين وراك ما تاكل لك تراب وتعطيني دراهمي والا تنتزلع؟
قام زيد وطلع الفلوس واعطاها عمه
وقام بيحب راسه ودفّه عمه وقال وخّر عني بس
ييزي ماجاني منك من الحتسي ..يالله اظهَر وراي شغل
قال زيد مانيب ظاهر لين تخليني احب راسك
قال اها حبّه وعجل علينا
وحب زيد راس عمه وقال :
وش ريحة راسك يا عمي؟
والله ان ابوي قايله ,,يقول صح عمّك ما عليه
بس انّه مهوب يتطيب ..ريحة صنانه توصل راسه..
قام عمه ودزّه ووقال :اقول انتزلع الله يقلعك يا المشعر يا القنفذ
الى اللقاء في الحلقه الاخيره قريبا
والله قريبا 