عزيزي السائق السعودي ومن يسكن في الرياض خاصة

هذي بعض النصائح التي لا تقدلر بثمن ..

نصائح يقدمها سائق مخضرم

اقرأها واجعلها لك نبراسا ينير لك طريق الملك فهد

وطريق الدائري الشرقي والغربي والشمالي والجنوبي

كما ينير لك شارع  شارع المدارس بالشفا وشارع انكاس

وشارع حمزه بن عبد المطلب وشارع سدير

البوري

اذا وقفت عند اشاره وقدامك راعي لاند كروزر ومعه واحد من خوياه

فالاكيد انهم يحكون في الاسهم  ..

تلقى واحد يقول للثاني :

والله اني معلمك ومحذرك وقايل لك لا تبيع كيان وتروح تبيعها

والثاني يقول :

وانا بعد نصحتك تشتري الدوائيه وما سمعت كلامي ..دوووك الحين وين وصلت

  وهم ولا واحد منهم استفاد من نصايحه لنفسه

وتلقون واحد منهم حاط 200 الف ومابقى منها الا 3000

 قاعد يضارب بها مهوب علشان يبي يربح لا ابدا

علشان يعرف يسولف مع خوياه ..

والثاني تلقونه كان حاط 400 الف في السوق وما بقى منها الا 22 الف

وسحب منها 3200 رواتب شغاله بتسافر نهائي و6000 تقديم لشغاله جديده

هذا خله على راحتهم واصبر واحتسب الاجر

لاتصير انت والزمن والاسهم

وراتب الشغاله القديمه وتاشيرة الشغاله الجديده والبوري عليه

من باب الذوق والاتيكيت

اذا شفت يوكون والا تاهو والا جيب والا اكسبلورر والا صالون والا ونيت غمارتين

وفيه واحد ومعه زوجته فأكيد انهم زوجين قديمين واكيد انهم يتناقرون او ومتزاعلين

 لا تضرب له  بوري خله براحته لا تصير انت والزمن وخرطمة زوجته والبوري عليه

لا تضرب بوري  لواحد شباب سيارته صغيره ومعه وحده راكبه قدام 

لان الاكيد انهم توهم معاريس ..

لا تضرب له بوري وتحسسه قدامها انه فاهي

 همن ينزل عليك بيسوي نفسه قوي قدامها

همن تضطر تكوفنه ويطيح من عينها

لا تكون انت و تكاليف الزواج  عليه

لا تصير عليه انت والبوري وصدمته في زوجته بعد ما تسبحت اول ليله

تجنب عزيزي السائق انك تضرب بوري لراعي كابرس صابونه

تراه تصرف ارعَن و عيب ومهوب زين

حتى لو انه يمشي 23 ونص ك م في الساعه

وماسك يسار ومتعنّقط في الدركسون ومن زود الحماس شماغه واصل لين علباه

ولو.. لاتضرب له بوري ولا تكبس له النور

عشان اللي يسوق كابرس صابونه تراهم دايم في مقام ابوك او جدك

وان كان اللي يسوقها  عمره 19 سنه

كذلك لاتزعجه بالبوري

 مادام سيارته كابرس صابونه تراه بعد في مقام ابوك والا جدك

اذا كنت رايح للدوام ومتاخر وكان قدامك راعي هوندا يمشي بشويش

وانت تشوف الاشاره خضرا وودك تلحق عليها حاول انك تتمسك برباطة جأشك

وان كان جأشك ما فيه رباطه فتمسك في جأشك كله

وان كان ما عندك جأش فلا بأش

ولا تحارشه لا ببوري ولابتكبيس نور ..

لان سائقي الهوندا اكورد  بعضهم فيهم عنادن ييزي نصفه

ان كبست له النور والا ضربت بوري ومهوب فاتح لك الطريق ولا مسرع شوي

بيمشي بشويش لين يوصل للاشاره وهي صفرا او حمرا وبيقطعها وبيخليك تاكلها ..

والبعض الاخر منهم يدور الطقاق باللهي به

 حارش مارش اللهم يا كافي

 وتلقون اغلى شي في حياته الهوندا اكورد همّن بنطلون البرمودا

همن الكدش همن امه وابوه

وتلقاه يغار علي الهوندا اكثر من حبيبته او زوجته

واي تحرش فيها بينزل منها يبي يردغك

وان كانك نشيط وقدرت تغوله , فبتكتشف انه بلمح البصر فزع  معه 15 شخص

كلهم معهم هوندا وكلهم كدش وكلهم لابسين برمودا  

وين طلعوا .. منه الله اعلم

وبيغولونك غووووول قدام لله وخلقه

فعليك وانا اخوك اذا جا قدامك صاحب هوندا اكورد  انك تنسى البوري والنور

اعتبرهم خربانه 

ولا تدري وشهو له تداوم خذ لك يوم اجازه مرضيه

النرفزه والسب واللعن والبصق

اذا كانت ليلة خميس او ليلة جمعه  والساعه من ال1 الى ا2 بغد منتصف الليل

وكنت واقف عند اشاره وفجأه جاك واحد وصدمك على الصدام الخلفي

احذر ثم احذر تتنرفز وتعصب وتنزل له وتسبه وتشتمه

ولو قدر الله عليك نزلت له  تراك بتشوف شخص  كان يسوق سياره

 من كثر ماهي مصدّمه ما يعرف وش توعها ولا موديلها

وانه شخص من بشاعة شكله وشعره ولونه

ما يعرف هل هو انس والا جن

عندها ..عليك انك تتاسف منه انك كنت واقف عند الاشاره وهي حمرا

لو كنت تسوق في طريق الملك فهد وكان قدامك اخ من جمهورية مصر العربيه

يسوق سياره بيجو موديل 88 م ويكلم بالجوال .. طبعا مهوب هو اللي متصل

وحذف البيجو عليك وصدمك مع الرفرف

 لا تنزل عليه وتطقه وتكسر فيه أي شي

حتى لو  ضرس واحد

ترا اسرته بيرفعون عليك قضيه

وبيطالبون بتطبيق اقصى العقوبه على المتهم اللي هو انت

وبتلقى قضيتك تناقش في قناة دريم والمحور

ويتهمونك انك اتبليت عليه عشان طمعان في سيارته البيجو

حتى لو ان سيارتك جيب لكزس قيمتها تسوى تكاسي القاهره كلها  

اذا كنت ماشي بسيارتك و ومستعجل وقدامك باكستاني معه سياره  مازدا موديل  55 م

ومحمل فوق التنده 4 عربات رمل

وجوا السياره 15 مسحاة و10 شواكيش و12 مطرقه

وسيار ته تطلع كربون ودخل الكربون عليك وكتم انفاسك

 لا تعصب ولا تحاول تسقط عليه وتتفل بوجهه

لا تحارشه ابـَدن مرّه

وحتى لو ان الباكستاني شايب عمره 99 سنه

 صدقني, ترا ان طقّك ان ما يتعرفون اهلك على معالم شخصيتك الا بتحليل ال دي ان ايه

العادات الغريبه اثناء القياده

اذا كنت قروي وتوك طايحن في المغازل

منّاب قايلين لك لا تكلم ..بصرك الخساير عليك

بس يا اخوي لا تبلش خلق الله ونعرضهم للمخاطر

 لا تكتب لها رسايل وانت تسوق

والا تشتشت معها في البلاك بيري

ترا حبيبة القلب الشهبا مهيب طايره , بيمديك على كليوبثره حي الفواز

اذا وقفت عند اشاره والا مسكتك زحمه

لا تقعد تلفت على خلق الله وتطلطل عليهم

خاصه انتم يا اصحاب الجيوب

ترا بعض العوايل ياخذون راحتهم في سياراتهم

يا اخوان بعض اصحاب الجيوب متعته وقرة عينه في الدنيا

انه يعرف كم مقاس جزمة زوجة صاحب السياره الصغيره اللي واقفه جنبه

اذا وقفت عند اشاره وجنبك سياره عائليه مظلله

فالزم الهدوء والثقل والركاده

لاتحك خشمك ولا تحك شي ثاني

لاتكون زي واحد صاحبي ما اعرفه ولا يعرفني

كان واقف عند اشاره ومفهّي  ورافعن الثوب لين نص الفخذ

ويمرش ويمرش ويمرش

  وفجأه سمع حرمه تصايح وتنافخ وتقول :

عيب عليك ذا الحركات يا حيوان يا قليل الادب