حمود بين الوظيفة والزواج

الجزء الثاني

الجزء هذا عنونه حمود بين الحلال والعيال

بعد ما عرف حمود أن رقية بنت عمه تطلقت فكر أنه يأخذها ولكنه كان متردد لأنه متزوج

من وردة ورحمها  وكان دايم يردد البيت اللي يقول :

وردة تبينا لكن النفس ما تريد

                                   ورقية متاحة لكن البعد راحة     >> تحس الشاعر عراقي

على وزن

اللي يبينا عيت النفس تبغيه

واللي نبي عيا البخت لا يجيبه

المهم بعد تفكير عميق غرق فيه وما طلع إلا بستك

الاستك >>  قطعة من المطاط توضع داخل الكفر قبل ظهور ما يسمى بالتيوبلس وقيل ما

يوضع على الخاصرة لتجنب الغرق بالماء وقد تعددت أشكاله فمنه ما... المهم

قرر أنه يستشير رفيق دربه سليم اللي كان وقتها ماسكن شركة أبوه اللي كان نشاطها

التجاري كيفية علاج المسامير المصدية لإعادة أستخدمها للمرة الثانية العالمية المتحدة>>

أحس الاسم فيه شيء غلط

وكانت الصداقة مستمرة بينهم خصوصا بعد موضوع النسب و وقال له

حمود : أنا أبي أصلح بين أبوي وعمي سعود لأن ودي أعرس على رقية بنت عمي

سليم :  وبكل وقاحة جاي تقول لي يعني تبيني أساعدك تتزوج على أختي  !!

حمود : لا يا سليم بس أنت عارف إني أحب رقية قبل ما أعرف أختك و الاحين جاء الوقت

اللي لازم تقدر فيه وردة حبي لرقية

سليم: لا يا قليل الخاتمة يا للي ما تستحي بعدين أنت ناسي أن رقية كانت متزوجة هذا اللي

اسمه وليد وتركتك عشانه

حمود: لا أهي كانت مجبورة لأن عمي ضغط عليها...... صدقني >> نصاااااب

سليم : والله يا حمود أنا راح أساعدك من باب الصداقة اللي بينا و بس

حمود:  والله أنك وفي زي الكلب >> ما يعرف يتكلم

سليم : عمن يعميك أن شاء الله أنا زي الكلب

حمود : لا أنا أقصد أنك وافي زيه بس ولا تزعل أنت وافي زي الأسد >> ما يعرف يشبه

أنبسط سليم من التشبيه الغبي  >> دلخ بس يجي منه

 وقال :أجل شف رح لأبوك وقله أن عمي سعود كلمني وأنه ناويان يرجع دراهمك و

بهالطريقة راح يرضى أبوك ويصلح مع عمك

حمود: والله ما نتب سهل أنا من يوم شفت هالعيون الزرق وأنا داري أن وراي صتيمة

الصتايم

صتيمة>> بتقديم التاء على الميم مأخوذة من الصمت ولأن الصمت حكمة ببعض الأمور فقد

أصبح الناس يطلقون على من يرونه حكيم صتيمة >> اكرر لاحد يدقق

بعد كذا راح حمود لأبوه وقاله له : يبه البشارة

الأب: وش عندك يالمخيس ؟؟ >> أخلاق نعال هههههههه

حمود: أبشرك عمي سعود كلمني وقال لي انه يبي يرجع لك كل قرش أخذه منك

الأب: قل والله !!

حمود : قسم بالله ...>>> قايل لكم نصااااااب

الأب:  زين أنا كنت عارف أنه بيجيه يوم ويردها >> ثقة النصابين

حمود: إلا يبه أبسالك صدز أنت كم تطلبه ؟؟

الأب: اطلبه شين واجد

حمود : يعني كم ؟

الأب: عشر ت ألاف ريال لا الظاهر مية ألف لا لا عشرت ألاف

حمود : بس

الأب: إيه ليه

حمود: الله يهديك يااوبيي كل هالمشاكل على عشرت ألاف  !!

الأب : إيه لو أعطاني أيها كان استثمرتها  ودخلت ملايين !! >> مهوب عاقل دونالد ترامب

حمود : خلاص اجل أنا بروح أجيبها منه وبجي

بعد كذا راح حمود وكلم عمه وقاله يا عم خبرك الوالد سبير ووده يصلح معك قبل ما يموت

وتراه متندم ويقول أهم شيء أشوف أخوي

 وألا الفلوس ما تهمني >> خرااااااااااااط

العم : خلاص يا ولد اخوي أنا بجي له بالبيت وان شاء الله ما يكون إلا الخير

وفعلا جاء العم سعود لبيت أبو حمود وتمت الصلحة وخطب حمود رقية ووافق عمه و حددو

يوم الزواج وبعد ما طلع من بيت أبوه

جلس يفكر كيف يفاتح وردة بالموضوع

وراح للبيت يوم وصل ودخل جاه ولده صالح

حمود: وين أمك ؟

صالح: بالمطبخ

حمود : وش تسوي؟

صالح : تصلح لنا فتوش وكبة مشوية و صينية مجدرة >> قلبو أردنيين

حمود : وردة يا وردة ...أم صالح.... و صمخن يصمخ اذانيس

وردة : خير أن شاء الله يا بو صالح وش فيه ؟

حمود : أبيس بموضوع ضروري إذا قضيتي من الشغل تعالي لغرفتنا

وردة :أن شاء الله...ما فيك صبر>> تفكير المرأة

وبعد ما راحت وردة الغرفة

قال حمود : لو أن سيارتي متعطلة و أنا في بر ولا فيه ورشة إلا بعد عشرة كيلو وأنت معي

بتخليني أروح للورشة  وألا تروحين معي ؟؟

وردة: بروح معك

حمود : اجل تراني بعرس عليك >> ما يعرف يتكلم

وردة : ليه إن شاء الله وش جاك مني !!!!

حمود: الاحين توني شارحن لس ..سيارتي الواقفة هذي هي حياتي و أنا في بر هذي الدنيا

والورشة هذي رقية بنت عمي والعشرة كيلو هذي عمري اللي قضيته معس وسالتس

بتروحين معي وقلتي إيه يعني موافقة على الزواج >> مال أمه دخل الشرح بالموضوع

وردة من لحسه المخ ما عاد تكلمت وقال لها حمود الله يبارس فيس أنا والله داري انس ما

ترديني ووردة فهمت إن وده يتزوج وبكت

وقالت : يا خسارة يا حمود يا خسارة على العشرة كيلو اللي قضيتها معك>> أنلحس مخها

وراح حمود ورتب لحفلة زواجه من رقية  وتزوج رقية

 وقال :

مرحبا نورس غطى على اللمبات والكهربا جعل عيني ما تبسيس يا بنت عمي

 والله أني فرحان يوم شفتس سني شايفن ايشواريا راي >>  هين عااااااد

 وسكنها ببيت ثاني وحملت رقية

وجابت 4 توم بنتين وولدين >> ما فيه إلا بالجملة

وسماهم حصة على أمه وتهاني على أم رقية والأولاد سعود وناصر

ومرت الأيام و كبروا العيال وتوفى أبو حمود  وحضر العزاء  سليم و وأبوه وخاله اللبناني

 أبو عيون زرق و وليد راعي اللكزس زوج رقية سابقا وكان حمود ينظر له بعين الحاقد حتى

يوم قال عظم الله أجرك قال حمود: جعلك تلحقه

ولكن كان فيه ضيف ما راح يخطر على بالكم

من يا ترى ؟؟؟

درويش اللي بقصة هيلة والأحلام والمستحيلة دخل وقال :

وش ذا العزيمة يا حمود وراك ما عزمتنا الله يغربل إبليسك ؟

حمود : الله يسامحك هذا عزاء الوالد توفى

وقال درويش :  لا يا شيخ عظم  الله أجرك والله إن أبوك كان مذينا وكان دايم يتفل علي لا

مريت  أنا وولدي عبد الله بس ما عليه الله يرحمه إلا بسالك عساكم غسلتوه زين لان ريحته

وهو حي مخيسة كنت دايم اسلم عليه و أنا متلطم !!!

حمود : الله يأخذك بس هذا وقته توكل لا اتمردس ببطنك .

ومرت الأيام وكانت رقية تكيد المكائد لوردة عشان تخلي حمود يكرهها  لأن رقية بالأساس

داخلة على طمع لحد ما صار حمود ما عاد يطب على وردة أو حتى يسأل عنها أو عن عيالها

وبعد مرور كم سنة  كبر حمود وصار عنده شركات سبيرة و قامو عياله اللي من رقية

يطالبون بحقهم فيها من الإرث

فقال سعود: يبه نبي حقنا منك

حمود : وشو حقه ؟؟

سعود: نصيبنا من شركاتك و استثماراتك بمجال الدبابيس و إلا ناوين تعطيها عيال ذا اللبنانية

حمود : لا يا للي ما تستحي تبي تورثني و أنا حي وبعدين وردة ما هي لبنانية خوالها لبنانين

سعود : المهم أنا أبي اضمن حقي  أنا وأخواني

حمود : أنت ما تدري أني جلست أكد واتعب واجمعها دبوس دبوس مسمار مسمار لحد ما

صار عندي شركات دبابيس و مسامير حتى أن المسمار

 لا صدأ عندي وديته لصديقي يصلحه وبعدين ارجعه للشركة  >>  والله من النصب

سعود : والله مالي دخل فيك أهم شيء الدراهم

حمود بها لوقت حمود بكاء لأحد ما فصل عنده العرق اللي يوصل الدموع للعين وشبك بالعين

الثانية وصارت عين وحدة تدمع  كثير و الثانية لا كنه بزر جايه مصع  و أنعمت عينه اليمنى

لأنها نشفت

وراح سعود لامه رقية واللي هي كانت أصلا سبب تحريضه على أبوه

وقالت : بشر عساه كتب لك شي ؟

سعود: والله كتب لي طل شكله ناوين يعطيها عيال هالشامية

وبنفس اللحظة كانت وردة جالسة وساكتة وصابرة هي وعيالها صح إن حمود ما كان يقصر

عليهم بشي ولكن كان طانشهم مررررة وكانت رقية وعيالها مشطبين عليه يعني سفريات و

روحات و جيات و حتى أن مجلة بيبول أعطهتا لقب >> أم الحومات

ولكن ما عاد صبرت رقية وقالت لولدها : أحنا لازم نشوف لنا حل لها لشايب

سعود: وشلون يمه ؟

رقية : ما لنا إلا دار الأوبرا قصدي دار العجزة نوديه هناك على أنه مخرف ولا يدري وش

يقول ونبي نحط له حبوب هلوسة وبعدين نستولي على ثروته كلها

سعود: أبشري يا طويلة العمر

ونفذو اللي اتفقوا عليه وحطوا له بالشاي حبوب الهلوسة وودها ولده على دار العجزة

وهناك قابلو المدير وقال :أمرني يالطيب

سعود : ما يأمر عليك ظالم هذا الوالد كبر وخرف وقام يفصل ويقطع >> غيرو له بواجي

تقدر تسأله أنت وتتأكد بنفسك

المدير: وش اسمك يا أبوي ؟

حمود: أنا البحر في أحشائه الدر كامنون تجري الرياح بما لا تشتهي السياراتو >> فاااااااصل

المدير:  وشلونك يا بوي عساك بخير ؟

حمود : أنا بخير ياللي متصل تسأل شلوني تغديت شاورما وبيبسي بفضل الله

المدير: طيب وش اليوم ؟

حمود :  اليوم السحد !!

المدير : وش ذا اليوم الجديد !!

حمود لا جديد ولا شيء  السحد يعني يا طويل العمر بين السبت والأحد

المدير : لا حول ولا قوة إلا بالله خلاص أنت كمل بس إجراءات دخوله وأن شاء الله ما يصير

إلا الزين

وجلس حمود بدار العجزة وبعد ما نام وصحى و راح مفعول الحبوب  قابل أبو سعيد اللي ولده

فيه الجنية العاشقة أكيد عرفتوه وبعد ما سأله وش اللي جابك هنا قال أنا بعد ما ضربت

رأسي بالجدار طاح علي الجدار وقمت يوم جيت أمشي زلقت في أحد تفلات أبو مشاري اللي

على الأرض وأغمي علي ثم قام  تفل علي أبو مشاري ولا نفع فقام و جابني هنا لأن ولدي

تعبان و ما فيه أحدن يصاليني خصوصا إني قمت اقط سلك وسلك >> خيط وخيط

المهم جلس حمود بالدار لين طاحت عينه المقطوع عنها الماء >> ما سدد الفاتورة

حتى أنه لقي أبو سعيد يلعب بها على الجدار وضاق صدره

وبعد ما درى ولده صالح أن أبوه بدار العجزة عن طريق أحد الأقارب على طول طلع للمدير

وكلمه انه بياخذ أبوه عنده و بعد ما كلمه أبوه طلع اخذ أبوه عنده ورجع للبيت وعاش عند

وردة بعين وحدة وكانت وردة مبسوطة أنه رجع عندها وصلحت له كل اللي يتمناه وعرف أنه

غلط بحق وردة وقام يبكي بعين وحدة وطلق رقية وقال لها:

انزلعي لا بارك فيس وبالساعة اللي عرفتس فيها يا ليتني ما اخذتس  ما كسبت من وراس

أنتي و عيالس إلا العمى جعله يجيس  وقام يقول :

جاني  العمى من وراء شوفتس جاني

يا ليت عيني عمت عن شوفت رقية

ما غير اصبح وامسي دايم أعاني

نسيت وردة حبيبة قلب حورية

وبكذا انتهت قصة حمود اللي كان دايم .... المهم أنها

انتهت

 ولكن هل يسكت سعود ولده على اللي سواه صالح ؟؟

الجواب راح يكون بالجزء الثالث

لا يكون صدقتوا ترى امزح مهوب حلى هههههه

ولكن انتظرونا في قصص قادمة بإذن الله

ما يستفاد من الجزء الثاني اقعد على قردك لا يجيك أقرد منه

لأنك لو أخذت قرد على قردك  يمكن تجيبون قرود يقردون عليكم حياتكم

أتمنى تكون أول قصة لي أعجبتكم وانتظر ردودكم

ردودكم هي هدفنا اتصل الآن هههههههههههه

 وسامحوني على القصور

فلسعه